一個人去旅行@台北第五天

今日係第五日，夜晚就要搭飛機返香港囉。

 我去左大安森林公園，唔知大家有冇去過，而我係第一次去。

站內以四季為題。

 呢個公園都幾大，真係要行晒可能需要兩三個鐘，空氣好好行得好舒服。

我係第一次見真既松鼠，雖然有卡通裡面既咁得意，但係都好可愛。

仲有唔少雀鳥添喎。

 之後去左花博公園。

 本來諗住朝早去嗰個公園已經夠大架啦，點知呢個花博仲大，真係行到冇晒氣。

但係講真，我反而鍾意大安森林公園多D喎，可能係自然D，呢度好多嘢都係人工。

行到四點幾五點，係時候返酒店攞行李去機場。

 明明都未到登機時間，但係係都要人咁早去機場，一個人去旅行最難過既時候就係呢段，

困住係一個冇咩好睇既地方，又冇人傾下時間過得好慢，唯有係機場行嚟行去，

見到呢個介紹阿里山既展品，真係好想上阿里山呀~~~

 無端端有棵樹棟係度，咪行去睇睇，發現可以比人寫D類似心願呀、希望呀，

悶悶地又寫番個玩下。

 

呢個好方便，大家一睇就知咩年係咩生肖，唔錯唔錯。

一個人去旅行@台北第四天

第四日我選擇去淡水，今日天氣一樣好好，亦都係第一次去淡水係好天。

 

之前係酒店已經食左三文治(早餐)但係行過Dogut 見到好似好靚咁，都忍唔住買個嚟食。

 

呢個係咪好多人所講既耶穌光呢？

 

第一次見淡水好天。

 

呢間雪糕店好似都好出名，本來想試但係未開門，唔通我太早？

 

行行下見到小白露。

 

有時影張鏡中相都幾得意。

  

好天既紅毛城，樓紅D草綠D。

 

唔知點解有個小型紅毛城係度比人影相，更係唔可以放過啦！

 

本來係諗住去漁人碼頭，但係行到紅毛城已經好累，所以放棄冇去囉，下次應該係捷運站搭巴士去漁人碼頭，之後就行番出嚟紅毛城，行行下見到個個教堂都幾靚，仲有對新人係度影相，但係唔夠膽影佢地，因為唔係個個可接受。

 

連地板都有教堂個樣，幾勁！

 

行左成朝途中都買左好多小食食，想唔肥都幾難。

又買左一大堆黑糖，所以決定拎番酒店先再出去，目的地係南港捷運站，唔係要出站，只係係站入影相，影完就可以走，有咩好影？就係幾米啦~~~

 

係咪特別鍾意幾米？又唔係喎，不過我都睇過好幾本佢既書(繪本)，我覺得佢既書好特別，特別在唔同人睇完會有唔同既理解，因為其實佢字唔多，基本係以圖畫為主，所以每個人所睇既感覺都有所不同。

一個人去旅行@台北第三天

好懶好懶，我係話自己，好耐好耐都有2開個個BLOG，唔知仲有冇人記得我呢。o.o"

講番個旅行，第三日去左九份，第一次去九份係好天冇落雨，落雨可能會比較乎合悲情城市呢個名，但係我個人都係鍾意好天，心情都會好D。

 

妳望咩望？仲影我，再唔走信唔信我咬妳呀啦！我覺得佢心裡係咁諗。

 

去過幾次九份，但係第一次食呢個阿婆芋圓，味道唔錯。

行左一個朝早，亦都買左好多嘢，呢個時候就係度諗，去邊度好呢？突然聽到隔離有班台灣學生係度傾緊去邊，聽到基隆呢個字，諗諗下都好喎，橫掂我都未去過，所以就搭左巴士去基隆。

 

嚟到基隆發現黃色巨鴨係度，真係唔嚟唔記得，係話佢去完香港游左嚟台灣，係香港既時候我都冇去尖沙嘴睇，反而過到嚟台灣睇，真攪笑。

 

同香港一樣，迷呢隻黃色鴨仔迷都著左魔一樣，周圍有好多黃鴨。

行完基隆又去邊好呢？諗諗下去左東區，搵間cafe食個下午茶休息一下，之前係香港已經諗好去邊間cafe，點知其中一間已經結業，好彩仲有一間。

 

雖然我冇話特別喜歡呢隻貓，但係佢都幾得意。

 

佢上面係cafe下面係精品店，門口仲有呢個公仔可以比人影，但係精品店裡面係禁止拍攝。

 

連行上cafe既樓梯都有圖畫。

 

上到cafe係可以影相既，我去到既時候好似5點幾6點左右，下午茶時間就過左好耐但係晚餐時間又未到，所以除左我都好似得3-4個人。

 

連個天花版都係大壁畫，勁呀！！！

 

我叫左一壺水果茶，味道唔錯但係甜左少少。

 

登！登！登！其實我係係網上睇到呢個蛋糕所以嚟呢間cafe，而且真係冇介紹錯，好好味，兩個人分剛剛好，但係我係自己一個，呢餐下午茶我慢慢食，食左兩個鐘，而且飽到連晚餐都慳番。

 

走既時候已經天黑囉，經過呢間餐廳，佢話係新開張，但係實在太飽食唔落，下次再去台北會去試下。